“القضية فيها شي حااااجة”!! هكذا يهاجم أصحاب نظرية “مالك مزغب” ابنة بنكيران

عبد الصمد الصالح

+ رئيس الحكومة وظف ابنته إلى جانبه في الأمانة العامة للحكومة؟
– الأمانة العامة للحكومة هي وزارة على رأسها الوزير الضحاك.
+ إذن بنكيران أمر الضحاك لي معاه فالحزب باش يوظفلو بنتو؟
– الضحاك وزير مستقل محسوب على القصر لا علاقة له بالبيجيدي ويرأس الوزارة منذ سنواااات.
+ المهم بنكيران طلب منو يوظف لو بنتو؟
– سمية بنكيران اجتازت المباراة ونجحت في الامتحان الكتابي والشفوي.
+ ولكن هاد المباراة راه رئيس الحكومة لي وصلها خبارها حيت هاد شي ما كيوصلش لولاد الشعب؟
– المباراة أعلن عنها على موقع الوزارة وفي كل المواقع المهتمة بمباريات التوظيف في المغرب بحال وظيفة وبحال ماروك اومبلوا.
+ ولكن ماشي أخلاقي يكون باك رئيس الحكومة وتمشي تدوز مباراة وتنجح فيها، والمغرب عامر بالكفاءات؟
– البنت عندها ماستر فالقانون وماستر ثاني فالدراسات الإسلامية.
+ وعلاش باباها كينصح المعطلين يمشيو للتجارة وهي مشات للوظيفة؟
– سنوات والبنت كتبريكولي فأعمال بسيطة باش كتدبر حياتها، ودابا جات فرصة تقدمت ونجحت.
+ وعلاش بنكيران كيقول للمعطلين: الوظيفة أضيق أبواب، دابا وساع هاد الباب؟
– بنكيران كيقول الدولة ما غتخدمشي كلشي وكيقول لحاملي. الشواهد يتقدمو للمباريات ويدخلو بكفاءتهم، والمباريات ما عمرها توقفت، ديما كاينة وديما كينجحو ولاد الشعب وكيتوظفو
+ ولكن هاد المنصب باااينة غادي تشد فيه الملايين؟
– المنصب هو متصرف من الدرجة الثانية، يعني جهدها 8000 درهم.
+ وراه ماشي غير بوحدها كاينين ناس آخرين من الحزب ديالهم، واش ما شفتيش الصورة لي كدور؟
– الصورة كذب على الناس لي فيها، ولي لا علاقة لهم بالصفات لي عطاوهم، ومجرد اختلاق.
+ المهم القضية فيها شي حاجة؟
– بصح ملي ولات بنت رئيس الحكومة كتدوز المباراة فحال عباد الله باش تخدم بأجر متوسط راه فعلا “شي حااااااجة”.