الحاقد: طلبت اللجوء السياسي في بلجيكا حتى لا أتحول إلى عبد في المغرب

في هذا الحوار الحصري مع موقع “الأول”  يكشف مغني الراب معاد بلغواث (الحاقد) عن حقيقة طلبه اللجوء السياسي في بلجيكا، والأسباب التي دفعته إلى ذلك، كما يحكي عن موقفه من حكومة بنكيران وعن مشاريعه الفنية المقبلة ومواضيع أخرى..

أجرى الحوار: علي جاوات

• لماذا اخترت اللجوء السياسي؟
• صراحة أنا مكنتش معوّل نطلب اللجوء السياسي وكنت دائما ضد هاذ الفكرة ولكن لقيت راسي مضطر ومرغم ليها. على داك الشيك نشوف أنه من الأحسن نسميوه نفي وماشي لجوء سياسي، حيت أنا مكرهتش نبقى فبلادي وندير الموسيقى بلا ما ندخل للحبس ونتعرض للمنع والرقابة ونبقى تنحس براسي ديما محضي والضوسي ديالي موسخ. من ناحية أخرى، أنا ما بغيتش ندخل معاهم فالفيلم، ونولي حتى أنا واحد من العبيد.. قلت مع راسي حسن نبعد.
• لماذا وقع اختيارك على بلجيكا لتكون فيها لاجئا سياسيا؟
• ماشي أنا للي اختاريت بلجيكا. نورمالمون كان عندي كونسير فبروكسيل. وفهاد لوقيتة لي كنت فيها هنا توصلت بخبر بان البوليس جاو كيقلبو عليا فالدار وبأنه إلا دخلت غيشدوني فالمطار، وأنا طلع لي لحبس فراسي، يلاّه كنبدا نقاد فحياتي كنلقا راسي فالحبس، ثلاثة ديال المرات باركة علي …
• كيف استقبلتك السلطات البلجيكية؟
• عادي كأي لاجئ.
• هناك من يعتبر أن أعمالك الغنائية لا قيمة فنية لها خارج الشعارات السياسية التي تحملها؟
• هاد الناس كاين منهم بزاف، عبيد خلاها ريتشارد عزوز، أنا حاجة وحدة لي كنعرف هي أنه حتى حد ما يقدر يوصل لهاذ النوع ديال لكتابة، وهذا هو أحسن راب. وباش بنادم يدير هاد الراب خاصو يكون عندو “قـ…. ديال النحاس”.
• ما هي مشاريعك الفنية المستقبلية؟
• خدام على العديد من المشاريع: الميكسطايب، ومن بعدو الألبوم وقريبا غيخرج للوجود فيديو كليب أغنية “زومبي” وأغنية أخرى كنت اشتغلت عليها مع فنانين من عدة بلدان .
• ما هو مستقبل الراب في المغرب؟
• مستقبل الراب فالمغرب هو “عكاشة فاميلي”، والناس لي تابعين ليها في جميع أنحاء المغرب. (عكاشة فاميلي هي “أخوية” أسسها عدد من مغني الراب في حي عكاشة بالدار البيضاء).
• اشتهرت في أغانيك بالنقد اللاذع للدولة ورموزها. هل ستتراجع عن ذلك، بعد لجوئك إلى بلجيكا أو ستستمر في ذلك؟
• غادي نواصل كيف ما بديت واكثر.
• يعني أنك سوف تصعد من لهجة انتقادك لحكومة بنكيران؟
• أنا ماكننتقدش الحكومة. الحكومة محكومة من طرف المافيا المعلومة. أنا معروف كنتيري نيشان.
• ما هو رأيك في التجارب الموسيقية التالية: هوبا هوبا سبيريت- بيك الخاسر- كناوة ديفيزيون.
• هوبا هوبا سبيريت، لا علاقة فالكلمات ولكن الموسيقى ديالهم زوينة وكنسمع ليهم ملي كنبغي نزها بحال شيخات. البيك الخاسر، مكنعرفوش. كناوة ديفيزيون، معنديش فكرة.
• ما حكاية الوشم الذي تضعه على ذراعك؟
• يدي هاديك ومبرزطاتنيش وبنادم مالو؟